يا ناس **** وانا على شاهي وبسكوت ديمة
الرقم بايخ لكن الصوت قتال **** كنه مثل صوت المذيعة حليمة
قالت مساء الخير يا طيب الفال **** قلت ارحبي ترحيبة مستديمة
بالعود والصفري ودلة وفنجال ****واجبك يا بنت الاصول الكريمة
وردت بضحكة ثم قالت وش الحال ؟****قلت اشهد إن الحال عقبك سقيمة
قالت وهي تضحك بعد مثل الاطفال **** وانا بعد كني بدونك يتيمة
من يوم قالتها تزلزلت زلزال **** من فجعتي كني مسوي جريمة
قلت ارفعي صوتك تري مابه ارسال **** كذاب لكن المصيبة عظيمة
قالت اقول اسمع ترى هرجنا طال **** ممكن تصاحبني تراني وسيمة
واسمي الحقيقي اول حروفه الدال **** لكن يسموني البنات الزعيمة
صحيح احب الفخفخه واعشق المال **** لكن تراني طاهرة مستقيمة
ما عندي امغازل ولا ( لعب جهال ) **** ما عندي إلا في الشرف والحشيمة
بس الصراحة قلبي لشوفتك مال **** واصبحت وحدك جالس في صميمة
فكر بعقلك واترك القيل والقال **** واحذر تطيع اهل العقول العقيمة
وارسل علي الحين خمسمية ريال ****اشحن بها جوال اختي غنيمة
او طقم غالي فيه خاتم وسلسال ****اروح به في عرس ولا عزيمة
قلت الحقيقة ما نيب رجل اعمال **** ولاني بتاجر والموارد عديمة
انا الصراحة شبه عطال بطال **** وعلاقتي بالفقر جدا حميمة
والراتب الله يرحم الحال ما زال **** محدود والمصروف ربي عليمه
والدين بالآلاف والبنك شغال **** ياكل فلوسي بالربا والظليمة
والسوق طايح والغلا ضيق البال **** والموت والله صاير اكبر غنيمة
قالت تحمل بس والحمل ينشال **** خلك شديد الباس صلب العزيمة
ياخي تصرف جعلك اتصير نشال ****اهم شي إن النوايا سليمة
[/img]